O loo faia nei suesuega a leoleo Ausetalia i le alii Samoa e galue faavaitaimi i Ausetalia, i le avetaavale faatamala ua maliu ai le tagata.

O loo lipotia mai e le tatou paaga e sootaga i le Pulega o tagata faigaluega faavaitaimi, o le alii ua maliu e faigaluega faatasi ma le avetaavale i galuega faavaitaimi. O le malologa puupuu a le aufaigaluega, na faatotope ai le toalua lea i le taavale a le aufaigaluega, e lafo mai a la tupe mo aiga i Samoa nei. 

E lei leva ona i luga o le auala pefu, e masalomia na saosaoa le taavale, ma e iai faaletonu o le taavale, ae kolosi ane le meaola, Komoto dragon, pilio‘ua, i le auala ma taumafai ai e sefe le meaola, ae oso ai le taavale i tua ma mafuli ai.

Na manu’a tigaina le avetaavale, ae o le isi na nofo i le nofoa o le pasese na taatia ai i luga le taavale, ma maliu ai lava. Mai le tatou paaga i Ausetalia, i molimau, e le mamao ese lava le mea na lavea ai le taavale ma le faatoaga e galulue ai ia fanau a Samoa. 

O loo molimauina mai pea le aafia ai o soifua o fanau atu i le Pasefika aemaise o Samoa i faalavelave tau taavale. 

O faamaisega ma faamafanafanaga i matua ma aiga loto faavauvau ona o le aafia faafuasei o le soifua o le alo.