O le vaiaso nei e tapunia ai le avanoa e resitala ai sui faatutū mo faiga palota laiti o loo loma nei.
E maea ifo le Aso Tofi o le vaiaso nei e to’a 19 i latou ua faaulu o latou suafa mo lea faamoemoe. I lea aofaiga e to’a 9 sui tauva o le vaega faaupufai e Puipuia Aiā Tatau o Tagata le HRPP ae to’a 10 sui mai le vaega faaupufai o le Faatuatua i le Atua Samoa ua Tasi le FAST.
O le tapunia ai o le resitala i le faaiuga o le vaiaso o le faauluina o sui faatutū o le a mautu ai se aofaiga atoa o sui tauva faapea patī faaupufai o le a tauva mai ai.
E pei ona silafia e 7 itumalo faapalota lea o le a saili ni o latou sui faipule i le faiga palota laititi i le Aso 26 o Novema ina ua avanoa o latou nofoa i le Palemene.
O itumalo uma nei e 7 sa manumalo ai sui o le HRPP i le faigapalota tele i le masina o Aperila peitai ina ua maea faamasinoga o faatosina o faigapalota o nisi ma faamaonia o latou tuuaiga a’o nisi na faamavae ae toe foi e fai le palota laititi.
