Ua logoina uma nei pisinisi laiti o loo faagaioia i le nofoaga sa iai le maketi i Savalalo mo le tapunia uma i le faaiuga o le masina nei o Iuni, o se vaega tāua o tapenaga i le toe fausia o le nofoaga fou, ua faatupe i se foai a le Malo o Niu Sila, ma le sao o le Malo o Samoa.
O lea ua mae’a tauofoga ma ua faamautu le kamupani konesale o le a pulea le vaaiga atoa o le fausia o lea galuega tele i le tau e tasi le miliona 118 afe tala.
O lea ua faasalalau e le faalapotopotoga o eleele o Samoa e pulea lea maketi ni ofo mo le talaina uma i lalo o vaega o le nofoaga o loo iai nei a o lei amata fausia le maketi fou i Savalalo i se tau e silia i le 20 miliona tala.
O Ianuari o le tausaga e 2016 na faatama’ia ai le maketi i Savalalo i le malaia poo le afi, ma o se maketi e tele ona talafaasolopito i le amataga mai o le atina’e o le tamaoaiga o Samoa i le itu i faatoaga, ae o se nofoaga foi e tele talafaasolopito o mea sa tutupu i le olaga o soo se tagata Samoa sa soifua mai i le taimi o iai lea maketi.
