O loo tapuaia e le Komesina ma le Matagaluega o Leoleo, Falepuipui ma le Ola Toe Fuataina pe o le a faamanuiaina le sui Komesina o le matagaluega le susuga Papalii Monalisa Tiai Keti, i le filifiliga o faailoga taualoa a le faalapotopotoga faavaomalo ua ta’ua o le Australasian Council of Women and Policing (ACWAP), i galuega ma tiute faa-Taitai poo le leadership.
Na faailoa e le Komesina le susuga Auapaau Logoitino Filipo, i le vaiaso nei o loo malaga le sui komesina i se fonotaga a lea faalapotopotoga faavaomalo, ma auai i le tufaga faailoga taualoa ona o le susuga Papalii Monalisa Tiai Keti, o se tasi o sui filifilia poo se finalist, mo lea tufaga faailoga taualoa.
O le ofi atu o le sui komesina i lea faamoemoe, o loo faatāua ai lona sao i tiute faa-Taitai i galuega faaleoleo i Samoa e le gata i tiute tauave faatamaitai i totonu o le matagaluega ae o le faatinoga o ona tiute, a o sauni ma tapena le atunuu i le palota tele talu ai.
O loo talosia e le Komesina o le matagaluega ia tau lau o le faamoemoe ma faamanuiaina le sui Komesina i lea faamoemoe tāua.
