Ua faagasolo tapenaga a le Ofisa o le Loia Sili a le Malo mo le tuuina atu o teuteuga o le Tulafono o Faamasinoga o Fanua ma Suafa na pasia i le tausaga e 2020, mo se iloiloga a le Palemene pe a toe tauaofia i le masina o Tesema.

O le folasaga a le tamaitai Loia Sili i le suesueina o le talosaga a lē sa avea ma Peresetene o Faamasinoga o Fanua ma Suafa i le amataga o le vaiaso nei, na faailoa ai lea tapenaga o teuteuga.

O se tasi o tapenaga na faailoa e le Loia Sili o le filifilia o Faamasino o lea faamasinoga ona ua faaleaoga ma soloia le tulafono tuai o le tausaga e 1981 na filifilia ai.

O se tasi lea o lape i le tapenaina o le tulafono o fanua ma suafa o le tausaga e 2020 na mafua ai ona taofia le faagasologa o galuega masani a lea faamasinoga, ina ua amata faamamalu le malosi o le tulafono fou i le masina o Mati o le tausaga na tea nei.

O le taofiga lea na mafua ai ona oo se talosaga a lē sa faauluulu iai le faamasinoga o fanua ma suafa i le faamasinoga maualuga, ma aumai ai le faaiuga e faaauau pea nisi o galuega ma tiute o faamasino i ni vaega o le tulafono o le 1981 ae toe foi le tulafono fou i le Palemene e faasaga tonu nisi o lape i lona tapenaina.