O le faaiuga o Iulai o le tausaga nei e oo atu i le masina e sosoo ai o Aokuso o le a faailoga ai e le asosi o tama ma teine tuai o le Malisi le atoaga o le selau tausaga talu ona faavae lea asosi ua toe mafuta ai i latou sa a’oa’oina i aoga a le Malisi i Samoa.

O se tapenaga o loo tagi i lima ma ua afea ai nisi o kamupani ma pisinisi i le atunuu mo se fesoasoani.

O le kamupani e tala ma lafo ai tupe faamomoli o le Pacificezy ua na foai le 10 afe mo lea faamoemoe. 

Le afioga Aumua Tuatagaloa Ming Leung Wai o le Pelesetene o le asosi o tama ma teine tuai o le Malisi.

O le foai a le Pacificezy ua lē gata ina tuuina atu mo lea asosi, ae o le masina nei foi sa afea ai i le agalelei o le kamupani i lenei masina o Me nisi o faalapotopotoga tuma’oti e pei o le galuega o le fausia o le nofoaga o tamā ma tina matutua i Savaii le Mapu i Pulotu, o le asosi o tama ma teine tuai o Avele mo le latou taamilosaga taga polo, o le lagolago i tausaga taitasi i le Danard ma Avila le lanu samasama, faapea foi le foai mo le kolisi o Sanele.

Faaalia e le alii pule o le Pacificezy i Samoa afioga Magele Daniel Ah Kau, o le agaga maualuga o le latou auaunaga o le fesoasoani i le lautele o le atunuu ma faafoi iai le faafetai i le lagolago atu foi i le Pacificezy ma lana tautua faapisinisi.