Ua tapena le solo tetee a fomai sinia ma fomai nifo i le mae’a ai o feutanaiga e leai se taunuuga manuia o talanoaga mo o latou totogi.
O se fuafuaga ua sau ai i le mae’a fai mai o le matagaluega o le soifua maloloina i sui o le asosi ua ta’ua o le Salaried Medical Specialists e tapena o le a agai mai le real-value pay cut mo le isi tausaga, ma e tolu iai tausaga sosoo.
O totogi nei o le a iai pea le siitaga peitai e i lalo mai o le inflation o loo iai nei.
Peitai o le manaoga o sui o le asosi ia faia totogi e faafetaui ma le inflation.
Ua mae’a palota ai ma le silia ma le 80% o sui o le asosi ma fai mai o le a faia a latou solo tetee e tolu ina ia faailoa atu ai i le matagaluega ua lava lea.
O le aso 5, 13 ma le 21 o Setema o le a faia ai tetee nei mai le lua i le 4 itula le umi.
I se tali mai le matagaluega o le soifua maloloina, o loo galulue nei ma sui o le asosi i le maliega e malilie uma iai ma toe vaavaai i auala e mafai ai ona faalēaogāina solo tetee ua ta’uta’u.
