Ua tapena loia a le afioga Fepuleai Atilla Ropati e faato’ai i le faamasinoga i se tulaga aoao tetele, se talosaga e lu’i ai i ni finauga faaletulafono, le faamutaina o lona taimi galue e pei ona sa avea ai ma Peresetene o Faamasinoga o Fanua ma Suafa talu mai le masina o Aokuso o le tausaga e 2016.
Na faailoa lea tulaga e loia a le afioga Fepuleai Atilla ina ua mae’a ona fofogaina le faaiuga a le afioga i le Faamasino Sili, afioga Satiu Simativa Perese, ua teena ai le talosaga a lē sa avea ma Peresetene o Faamasinoga o Fanua ma Suafa lea na finau ai e ala i ana loia, ina ia faaauau lona tofiga e mafua ina ua aloaia le tulafono fou o Faamasinoga o Fanua ma Suafa na pasia e le Palemene ia Tesema o le tausaga e 2020, ina ua toe sainia e le Ao o le Malo i le aso 14 o le masina ua Oketopa ua alu atu nei.
O le faaiuga a le Faamasino Sili i le talosaga a Fepuleai mo se poloaiga e faaauau ai lona tofiga lea ua teena ma faaleaoga, ua taoto mai ai se isi finauga faaletulafono o le a saga auiliili ai nisi suesuega, i le fesili pe na faamalosia ona aveese lē sa avea ma Peresetene, ae o a ni aiaiga faaletulafono ua taoto i teuteuga o le Faavae ua fausia ai tulafono fou o le Faamasinoga o Fanua ma Suafa, ua amatalia nei ona faamamalu lea ua filifilia ai se Peresetene fou na te tauave le vaaia o le Faamasinoga o Fanua ma Suafa i lalo o aiaiga o se isi tulafono fou.
O le afioga Fepuleai Atilla Ropati na filifilia i aiaiga o le tulafono o fanua ma suafa o le tausaga e 1981, lea ua soloia lona aoga faaletulafono.
