E ui na muamua oo mai meapu’eata poo surveillance camera i Samoa ina ua faateleina pisinisi a le au Asia aemaise o faleoloa tetele supamaketi, sa maua ai gaioiga uma e oo i faiga solitulafono, ae o lea ua faailoa e le Komesina o leoleo, o le a faapipii i se taimi e le o toe mamao masini pu’eata poo CCTV cameras i nofoaga eseese i le taulaga o Apia.

O se tasi lea o fesoasoani a le Malo o Ausetalia e lagolago ai galuega o le puipuiga o le saogalemu ma suesuega i faiga solitulafono o loo feagai ma leoleo i aso taitasi, ae o le a fesoasoani foi i le faatinoina o le puipuiga i le taimi o le fono a taitai o Malo o le Taupulega ia Oketopa o le tausaga fou 2024.

E lei maua se finagalo o le Komesina o leoleo ona ua le toe maua ni feiloaiga masani ma tusitala, ma ua siliga foi pe a saili i auala o fesootaiga i telefoni ma luga o le api o foliga, ae ua saunoa le afioga Auapaau Logoitino Filipo i le nusipepa o le Samoa Observer, ma ia faamaonia ai lea fuafuaga.

Ua mae’a ona filifilia nofoaga o le taulaga o le a faatutu ai ia masini pu’eata ma o se tasi o nofoaga o le alatele autu i le taulaga le Beach Road, ma nofoaga e masani ona tele faiga solitulafono e tutupu ai.

E le o faailoaina e le Komesina o leoleo ia nofoaga ae o se tasi lea o suiga e ao ai i le atunuu lautele ona latou silafia, ina ne’i maua ane ai se isi o tu sese ai i se nofoaga o iai se masini pu’eata.