Ua taunuu i Samoa se fesoasoani tāua o ni fomai manu mai Niu Sila se toatolu ma tausi soifua fesoasoani poo vet nurses e toatolu, mo le faia o se uluai galuega i le motu i Savaii o le togafitia lea o taifau ma pusi a aiga, ina ia taofia ai le taaloa, ma taofia ai foi ni faamai e latou te feaveai ma pipisi atu i tagata soifua.
O le faalapotopotoga o loo puipuia meaola i Samoa le Animal Protection Society ua galulue faatasi ma le faalapotopotoga o le puipuia o meaola i le Pasefika e faamautu i Niu Sila, ua latou tuufaatasia tapenaga e faatino ai lea galuega tāua.
O le vaiaso atoa o lumanai nei mai le Aso Gafua i le Aso Faraile o le a faagasolo ai lea galuega e le gata e togafiti ni faamai o aafia ai taifau ma pusi, ae faia ai foi taotoga mo ia meaola ina ia taofia ai le taaloa.
E amata le galuega i Salailua ma agai atu ai i le itu Asau, faasolo atu i Sasina i le Aso Lulu 10 o Me, ae Aso Tofi ma le Aso Faraile aso 11 ma le aso 12 o Me ua taunuu i Salelologa ma faaauau le galuega.
O nofoaga o loo iai ofisa o le matagaluega o faatoaga ma faiga faiva i afioaga e pei ona faailoa atu o le a faia ai togafitiga a fomai manu mai Niu Sila, ma o se galuega e leai se totogi.
O lona uiga e fai fua, ma o se avanoa lelei tele mo o tatou aiga i Savaii.
O Upolu o loo tele ina maua lea fesoasoani i tausaga ua tuanai ae o lea faatoa oo atu i Puleono i Salafai.
