Ua tapena se talosaga a le itumalo faapalota o Faasaleleaga Numera 3 i le faamoemoe etuuina atu i le Malo, ina ia toe faafoi atu eleele o loo i uta o nisi o afioaga o le itumalo e pei o Safotulafai pe afai e lē o faaaogāina.
O le tatalaina i le vaiaso nei o le ofisa tutotonu o le Fono Faavae o le poloketi tasi le miliona tala a lea itumalo, na faailoa ai lea talosaga e le sui faipule o Faasaleleaga Numera 3 le afioga i le Fofoga Fetalai susuga Papalii Li’o Oloipola Ta’eu Masipa’u. E iai le talitonuga o loo autu le talosaga i le fia faaaogā o ia eleele i atiina a’e o le poloketi tasi le miliona tala a Faasaleleaga 3.
O le ofisa o le fono faavae a le itumalo ua fausia ma faatūina i le afioaga o Sapapalii, e faafeagai tonu ma le Malumalu EFKS, ma na faaalia e le faipule o le itumalo e iai le mafuaaga tāua.
Le sui faipule o Faasaleleaga Numera 3 o le afioga foi i le Fofoga Fetalai o le Palemene, susuga Papalii Li’o Oloipola Ta’eu Masipa’u, i le tatalaina o le ofisa fou o le Fono Faavae a lona itumalo faapalota.
O le Minisita o loo iai le vaaia o le poloketi le afioga Leota Laki Lamositele Sio na saunoa i le saunoaga autu o le faamoemoe o lea itumalo palota o Puleono i Salafai.
Le Minisita o Tina ma Tamaitai Atina’e o Afioaga ma Agafesoota’i o loo iai le vaaiga o le poloketi tasi le miliona mo itumalo faapalota e 51, le afioga Leota Laki Lamositele Sio.
