O lea ua faailoa e le ta’ita’i o le Malo le mata’itū ai nei o ni aafiaga o le gataifale o nuu ma afio’aga o loo goto ai le vaa su’esu’e o le fitafita o le sami o le Malo o Niu Sila, e pei ona faagasolo iai galuega mo le puipuia o figota ma i’a o le gataifale aemaise o ‘amu.
Sa fesiligia le Palemia i se silasila a le malo i ni taui e ono maua e nuu ua aafia o latou gataifale.
Na faaalia foi e le Palemia le afioga Fiame Dr Naomi Mataafa, o le faia o se su’esu’ega tuma’oti e sa’ili ai le mafuaaga o le mea na tupu i le vaa, o le matafaioi lea a le malo o Niu Sila auā o le latou meatotino, ae o Samoa lava ia o loo mata’itū pea ni aafiaga o le gataifale.
O galuega o loo feagai nei ma se vaega o le ‘aumaulu mai Niu Sila o loo faaauau pea, ma sa maua ai se avanoa e fesiligia le ta’ita’ifono o le komiti a le Malo o Samoa e gafa tonu ma galuega i ni aafiaga o le tatou gataifale mai ni suāuu masaa.
Faaalia e le ta’ita’ifono o le Ofisa Sili o le Matagaluega o Galuega Tetele ma Fela’ua’iga le afioga Fui Tupa’i Mau Simanu, o loo iai le fuafuaga o le ogatotonu o le masina fou o Novema e taunuu ai sui o le kamupani o le a latou faia le galuega o le aveese o suāuu uma o loo i tane tetele o le vaa.
Ua faaalia e le ta’ita’ifono sa iai le fuafuaga e taofia galuega o loo faia nei i le ogasani o loo goto ai le Manawanui i le taimi atoa o le fono a Malo o le Taupulega, peitai ua toe faia se suiga i le faaauau pea o ia galuega ona o se talosaga mai le malo o Niu Sila.
Se faatalanoaga ma le afioga Fui Tupai Mau Simanu o le Ofisa Sili o le matagaluega o galuega tetele ma fela’ua’iga a le Malo, o ia foi o le ta’ita’ifono o le Komiti a le malo e gafa ma galuega fesoasoani i ni aafiaga o le gataifale mai ni suāuu masaa.
