Ua galulue faatasi nei le Matagaluega o Tupe a le Malo ua faasee iai le vaaia o le polokalame o galuega faavaitaimi, ma le matagaluega o le va i fafo faatasi ai ma le ofisa o le Komesina Maualuga o Samoa i Ausetalia, mo le tapenaina o vaega uma mo le aumaia i lo tatou atunuu o tino o alii e toafā o tagata faigaluega faavaitaimi na fano soifua i se faalavelave tau taavale i le setete o Vitoria i le faaiuga o le vaiaso na tea nei.
Ua faailoa lautele i se pepa o faamatalaga mai le matagaluega o Tupe a le Malo, e lē o mafai ona faailoa aloaia le mafuaaga o le faalavelave i le taimi nei ona o loo faaauau pea suesuega.
I se feiloaiga a le Minisita o Tupe ma tusitala na faailoa ai e le afioga Lautimuia Uelese Vaai, o le faamuamua a le Malo o loo ave i le aumaia i le atunuu o tino maliliu peitai e faalagolago lea tapenaga i vaega uma o suesuega i Ausetalia e tatau ona faamalieina.
Ua faailoa foi e le Minisita o Tupe, o loo faamauina e talu ona amatalia le Polokalame o Galuega Faavaitaimi o le R.S.E. a Niu Sila i le faigapaaga ma Samoa i le 2007, e toafā e ua maliliu a o iai i Niu Sila ia latou konekarate.
A o le Polokalame o Galuega Faavaitaimi a Ausetalia le P.A.L.M. e to’a 12 tamafanau a le atunuu ua maliliu talu mai le 2012.
Ua faailoa foi e le minisita o loo faamauina foi, o i latou uma ua maliliu, e lē o luga o taimi faigaluega na aafia ai o latou soifua.
O le toafā ua maliliu sa galulue i le Kamupanī o le Flavorite Hydroponics / Murphy Fresh.
