O le Aso Faraile o le vaiaso nei ua fuafua e fono ai le komiti o faagatama i le tai e taitaifono ai le Komesina o leoleo, ma sui o nuu ma afioaga faapea ni faalapotopotoga, i le faamoemoe e saili ni fautasi, vaa-alo, tulula ma paopao mo faigamea i le tai ua faatulaga e faia i le masina o Mati, o se tasi o polokalame o le faamanatuina o le 60 tausaga o le tutoatasi.
Ua faailoa lea fonotaga e le Komesina o leoleo, falepuipui ma le tineimu le susuga Auapaau Logoitino Filipo, ae o loo lumanai le fa masina seia tau atu i le masina o Me o le a tapunia aloaia ai polokalame uma o le 60 tausaga o le Tutoatasi o Samoa na amata faagasolo mai le masina o Iuni o le tausaga na tea nei.
O tapenaga muamua o faaagatama i le tai sa le faataunuuina, ina ua le lava ni sā e faaulu atu mo tuugafautasi, tulula, vaa-alo ma paopao.
O le faanaunautaiga o le komiti o le a faaosofia le agaga fia auai ma tauva o nuu ma afioaga, faapea faalapotopotoga i le faamoemoe ua toe tapena mo le masina o Mati.
O i latou uma e fia auai i lenei polokalame o le 60 tausaga o le tutoatasi, e tatau ona faatasi atu i le fono a le komiti o tuugavaa, e faia i le ofisa autu o leoleo i le Aso Faraile nei i le iva i le taeao.
