O le Aso Tofi o le vaiaso nei lea ua atofaina e le kalena a le Iunivesite o le Pasefika i Saute i Alafua e tatala ai lona laumua mo soo se isi e auai i le faalauiloaina ma faatalatalanoaga e le gata i auaunaga ae o polokalame eseese faaleaoaoga. 

E lua vaega o lenei faamoemoe e pei ona faamatala e se tasi o sui o le Ofisa a le Iunivesite, Galumalemana Ronna Lee i se polokalame ma le ofisa faasalalau a le Malo le 2AP. 

“O le vaega o le taeao e mo alo ma fanau aoga mai Kolisi e pei ona silafia o loo valaaulia uma lava aoga i Upolu ae le gata i lea o soo se tasi lava o maua le avanoa e afifio atu ai e molimauina lenei faamoemoe.

“O le mea moni, e toatele lava tagata e le o silafia e le na o aoga tau faatoaga o loo aotauina i le U.S.P. i Alafua ae o loo tele nisi o polokalame eseese o loo mafai ona e suesue ai.

“O le afiafi i le itula e 6 seia pāia le ta o le 9 i le po o le a faia ai se koneseti e faalauiloa ai nisi o kalapu o loo faia i totonu o le laumua.

“E lē na o le meaaoga foi e te faia i totonu o lenei Iunivesite e iai nisi o activities e o ai tamaiti aoga faapea ai foi ma siva mai nisi o fanau aoga mai isi atumotu o le Pasefika.” 

Na faaalia foi e Galumalemana o loo tapena e le Iunivesite auala o femalagaa’iga mo ē o le a fia auai i lea faamoemoe.

“E lua pasi ua mae’a saunia a leai sou auala o loo iai a tatou pasi ia, e tasi o le a faamautu i le Eleele Fou ma le isi i le laumua i Alafua.

“O le tāua o lou susū atu i lenei faamoemoe e te lē iloa lava lou mao i mea lelei atonu e faatupu manatu foi i le isi tagata e toe fia a’oa’oina se isi laasaga o le olaga aoga ae o loo mafai ona fesiligia ai a tatou faiaoga ma sui o le ofisa e fesoasoani atu.” 

O le faamoemoe o lenei lava polokalame mo le motu tele i Salafai o le a faatinoina lea i le aso 18 o le masina nei.