Ua tapena le matagaluega o le soifua maloloina e faatino se isi faainuga fualaau tele mo le atunuu mo le tineia ma le tafiesea o le faama’i o le mūmū tutupa, o se gasegase na amata ona maua i Samoa i le tausaga e 1924 a o pulea le atunuu e Niu Sila.
O lona uiga ua 99 nei tausaga o iai pea le mūmū tutupa e lei mafai ona faaitiitia ma tafiesea.
O se faama’i ua silafia e le toatele o le au tino i matutua ua maua i ona aafiaga ogaoga e pei o le tupa o le aao i le vae poo le lima, ae o le feau o loo tau molimoli nei e le matagaluega i le atunuu aemaise o tupulaga talavou e tāua le auai i le faainuga fualaau o le mūmū tutupa ina ia maua le puipuiga ma ia mate le anufe o le gasegase lenei e nofo i alatoto o le tagata soifua ma pipisi atu i isi foi tagata.
Ua faaalia e le Sui Faatonu Sili o le soifua maloloina le susuga i le alii fomai le afioga Tagaloa Dr Robert Thompsen, i faalauiloa a le soifua maloloina i lana upega tafailagi, e tatau ona ausia e Samoa le tasi le pasene e faaitiitia ai.
O le taimi nei e maualuga tele le pasene o tagata o loo aafia i le mūmū ma e tatau ai ona faatino le faainuga fualaau lea ua faamoemoe e faia i le masina fou o Setema mai le aso 16 i le aso 24.
Le susuga i le alii fomai o le Sui Faatonu Sili o le soifua maloloina le afioga Tagaloa Dr Robert Thompsen i le polokalame faalauiloa o le faainuga fualaau o le mūmū tutupa.
