Ua tapena nei le Failautusi o le ofisa o le Fono Aoao Faitulafono, e faatino le galuega e faalēaogā ai suiga na faia i le Tulafono fou o Fanua ma Suafa 2020, faapea le Tulafono o teuteuga o le Faavae o le tausaga 2020 ma faalēaogā ai le maliega na tuuina iai e le Ao o le Malo.
A mae’a lea galuega ona tuuina atu lea o kopi moni o ia tulafono e lua na pasia e le Palemene ia Tesema o le tausaga lava e 2020 mo le maliega ma saini ai le Ao o le Malo.
O le taunuuga lea o le fautuaga a le Palemene i le mae’a o le iloiloga a le komisi su’esu’e faapitoa a le Fono aoao faitulafono, na silasila ai i atugaluga o le Loia Sili i le eseese o kopi o ia tulafono aemaise lava suiga na toe faia iai, ae ua mae’a ona pasia e le Fono Aoao Faitulafono.
a iai le faamoemoe o le Malo a mae’a faatino tulaga ua taunuu iai le su’esu’ega a se soa komiti na tofia e le Kapeneta e silasila i le faaletonu ma avatu ai le latou fautuaga lea ua pasia e le Palemene le lafo faatū mo le toe faia iai o se galuega, ona toe foi atu lea o ia tulafono i le Fono Aoao mo nisi iloiloga atili.
Na saunoa le ta’ita’i o le Malo i le tamaitai Palemia ina ua mae’a pasia fautuaga e ala i le lafo, o le a mafai ona avanoa ai nisi teuteuga i ia tulafono e lua, lea ua taofia lona faaaogāina se’i mae’a ona toe faasa’osa’o faaletonu na aafia ai.
O le finagalo tali o le tamaitai Palemia i saunoaga a faipule o le Itu agai ma le itu a le Malo i le tulaga ua aga’i iai tulafono o le teuteuga o le faavae ma le tulafono fou o Fanua ma Suafa.
