O le amataga o le masina fou lea ua faailoa ai le toe faia lea o le faamoemoe a le Asosi o i latou o loo iai le tomai i faamatalaga faatekonolosi.
E pei ona faailoa ai e le Peresitene Leota Sarai Faleupolu Tevita.
“O loo autu lenei faamoemoe e faapea Meaningful Connectivity for an inclusive Digital Samoa ma o loo faasino lea mo i latou o loo faia le auaunaga lenei tau faamatalaga faatekonolosi i soo se vaega.
“E le gata o pisinisi o loo maualuga lo latou faaaogāina o nei auala e atina’e ai i latou o loo relate la latou auaunaga i faamatalaga faatekonolosi.
“E le faagaloina foi a tatou fanau aoga aemaise i latou o loo iai le naunautaiga e fia galue i lenei auaunaga i le lumanai.”
Na ta’ua foi e Leota o le taimi nei o loo faatalatalanoaina e le komiti faafoe le masii atu ai o le asosi e faatino lenei faamoemoe mo le motu tele i Salafai.
Ae mo le faamoemoe lava ia i le masina fou na ta’ua ai e Leota ua tapena le komiti faafoe e sailia nisi e fesoasoani i le faatupeina o lenei faaaliga faatasi ai ma nisi e fia saunoa ma faasoa lo latou tomai ua manuia ai.
“O faalauiloa ma faasilasilaga o lea faamoemoe o le a tuuina atu i le Facebook Page ma le upega tafailagi a le SITA faapea ma le NUSTV.”
O le aso 1-2 o le masina o Aokuso lea o le a faia ai lenei faaaliga i le fale Mataaga i Malifa.
