I le tolu tausaga talu ai na amata ai ona faatali le taina o le palolo ia Oketopa ma Novema e ala i le Palolo Festival a le sosaiete o atinae tau tagata tafafao i le tatou motu o Savaii, o lea ua toe faaauau mo lenei masina ma le masina fou, ina ua fetaui ma le toe tatalaina o tuaoi faavaomalo lea ua savalia nei le 3 masina talu ona toe tatala faasoloatoa le malaga mai fafo o tulisi ma lo tatou atunuu.

Ua faailoa e se sui o le sosaiete o le atinae o tulisi i Salafai le susuga Tupa’i Saleimoa Vaai, o se taumafaiga sa fuafua i le tau siitia o le atinae i Savaii, ina ia mafai ona fesoasoani ai i faletalimalo, o fale apitaga ma isi pisinisi e fesootai a latou auaunaga ma tautua ma le atinae o tulisi.

O le faletalimalo o le Va i Moana o le a faia se latou solo o taavale teuteuina ma se tuuga paopao, o ni tapenaga ua faaalia i se pepa o faamatalaga o le a unaia ai tapenaga faasamoa mai anamua e faatali ai le palolo.

O le autu ia malupuipuia pea o tatou siosiomaga faalenatura e pei o le puipuia o amu ma ogasami mai le soona faaaoga o nisi ituaiga o tapenaga e lamatia ai le saogalemu mo le lumanai o isi auga tupulaga.

Ua faaalia foi o le a iai ma se tauvaga o le taina o paopao aemaise ua faataoto foi ni tau talafeagai mo tulisi ma le atunuu o le a agai i Savaii e nonofo i faletalimalo i le taimi o le a ta ai le palolo.

O le aso 14 agai i le aso 16 o le masina nei o Oketopa o loo tau iai le asiga muamua o le palolo.