E 11 masina le matua o se pepe o loo ua taofia nei i le falemai o Tupua Tamasese Meaole i Motootua o loo masalomia ua maua i le misela.
Na faamaonia mai e le Ofisa Sili o Pulega ia Aiono Dr Alec Ekeroma lea tulaga. Na ia faailoa foi o loo ua tuuina atu nei i Niu Sila vaega mai lea gasegase e suesueina ai pe faamaonia.
O le afiafi o le Aso Sa lea sa fesootai atu ai ia Aiono ma fesiligia ai le faamaoni o tala o lea ua iai nisi ua aafia i Samoa peitai sa ia teena lea tulaga. O loo faapea mai le Ofisa Sili o Pulega e iai le popolega pe afai ua aafia le fanauiti i le misela ma e tatau ona utagia talosaga a le Soifua Maloloina ina ia vaai lelei pe ua fai tui o fanau pe leai ona faaoo ane lea i se falemai lata ane.
Sa faailoa foi ua tolu vaiaso talu ona o i tua le aufaigaluega e faasolo tuiga, ma ua iai foi le fuafuaga o le a faasolo i aiga i tua i le Aso Toonai le aufaigaluega e taumafai ina ia siitia le pasene o le fanau ua faia le tui lona lua.
E le o mavae tiga o le atunuu i le faamai lenei e pei ona m’aumau ai le silia i le 80 o soifua o fanau i le 2019.
O le a tålia pe o le a se faaiuga o le suesuega o loo tuuina atu i Niu Sila aua le nofouta iai o le atunuu aemaise o galuega a fomai i Samoa nei.
