O loo faatuputupulaia pea i totonu o Samoa le tulai mai o le solitulafono lenei o le umia o laau faasāina o le mariuana ma ua oo ia i latou o le tupulaga talavou ua tele ina taofia ona o lenei gaioiga.
I se feiloaiga a le Sui Komesina o leoleo Papalii Monalisa Tia’i Keti ma ofisa faasalalau i le vaiaso nei na ia faailoa ai se tasi o galuega a le Matagaluega lea na agai i se faatoaga i Afulilo ma taofia mai ai ni alii se toalua.
O i laua ua toafia nei o le tasi e 16 tausaga le matua a o le isi e 22 tausaga o le soifua. Ta’ua e Papalii e feololo lava laau mariuana na maua atu e leoleo i lea nofoaga faatasi ai ma nei alii.
Ua faatinoina nei galuega a le Ofisa e ala i le faia o moliaga talafeagai faasaga ia i laua ma o le a tālia nei se aso e tulai ai i luma o le faamasinoga e tali i o la moliaga.
E le o le taimi muamua poo le mulimuli foi lea ua maua ai nei faiga faasolitulafono ma e faafetaia e Leoleo le lagolago a le mamalu o le atunuu mo le logoina o le ofisa pe a vaaia nei gaioiga.
