O le a faaauau pea malaga ua uma ona faatulaga mo le masina lenei o Tesema mo galuega faavaitaimi i Niu Sila ma Ausetalia, ae o le a taofia mo se taimi lē tumau malaga na fuafua mo Ianuari.

I se saunoaga a le afioga i le Sui Palemia, Tuala Iosefo Ponifasio, i lana faatalanoaga i luga o le Radio Samoa i le polokalame o le Tanoa Ava, o le vaiaso na tea nei na toe liuliu ai le tofa i le Kapeneta ina ia taofi teisi le faaauauina o lenei polokalame, ae se’i toe iloilo ma faatulaga lelei faiga faavae na faatulaga mo lenei polokalame.

O le popolega o le Kapeneta i nei galuega, ona ua vaaia le oatu o kamupani mai fafo ua agai atu lava latou ma saili ma fili mai a latou tagata faigaluega, ae ua lē agai sa’o atu i le Malo o loo latou faagasoloina lelei le fuafuaina o nei malaga.

E le gata i lea, e iai foi le aiaiga a le faigamalo a Ausetalia talu mai ona manumalo le vaega faaupufai ua tumalo nei, ua latou ofo mai ai le visa, residency visa mo le tolu tausaga mo i latou e agai atu i nei galuega i le latou atunuu.

Saunoa Tuala, ua fai lava e le faigamalo a Ausetalia le latou faaiuga ma amata ona avatu tagata nei, ae e lei soalaupule ma le Kapeneta i faiga faavae e tusa ai ma le o o tatou tagata i nei galuega.

Ta’ua atili e Tuala, o le visa lea tolu tausaga e nofomau ai, e uma loa sosoo ai lava ma le sitiseni i Ausetalia, ma e leai se tasi e musu e talia lena ofa, ma e lē o taofia foi lenei polokalame, ae o le finagalo o le Malo ia fuafua lelei le faagasologa ia tusa ai ma faiga faavae na faataatitia.