O le malaga mai Apia mo Aukilani a le vaalele o le Air NZ i le afiafi o le Aso Sa na tea nei, e lei taunuu ina ua iai se faaletonu o le vaa ina ua feto’ai ni manulele ma afi o le vaalele.
O se faaletonu e seāseā ona tupu ae ua faaalia e se ofisa sinia o le kamupani vaalele o le Air NZ i Apia, ua aoaoina lelei pailate i taimi e tulai mai ai ni faaletonu faapea.
Mo le silafia e lo tatou atunuu sa iai foi ni faaletonu faapea sa tulai mai i ni tausaga ua mavae na aafia ai le vaalele tele o le Polenisia a o iai lea auaunaga tau vaalele mai Samoa mo Niu Sila ma Ausetalia.
O le taeao o le Aso Gafua na faatoa faataunuu ai le malaga na lē oo i le afiafi o le Aso Sa ona o le faaletonu na aafia ai le vaalele.
