O le alii talavou 16 tausaga le matua sa ia tosoina se tololi faatau, ae tietie ai sona uso tama talavou foi ma faalelea le tagavai o le atunuu, i le taimi o le solo a taavale a le aulagolago i le aulakapi liki le Toa Samoa i le Aso Toonai na tea nei, ua faaauau pea ona nofo taofia i le vaaiga a leoleo, e mafua ona o se tusi saisai sa faatonuina e le faamasinoga.

O le ata o le tololi faatau sa tosoina e lea alii talavou a o faalelea ai le fu’a o le saolotoga i le la lagolago ma lona uso i le tapuaia o taaloga lakapi a le Toa Samoa, ua avea nei ma fu’a taualuga o lagona o le toatele o Samoa i lo tatou atunuu ma le lalolagi, ona o le mataina o lea vaaiga aemaise sa mulimuli ai ma le la taifau a o faaali le la lagolago.

O le feiloaiga a tusitala ma le sui Komesina o leoleo le afioga Leiataua Samuelu Afamasaga na tali ai i le fesili pe aisea na taofia ai e leoleo lea alii talavou, pe le o se tulaga lelei ma mataina sa ia faia e lagolago ai taaloga lakapi a tamafanau a Samoa o loo tausinio i le Ipu o le lalolagi i le lakapi liki ma isi taaloga lakapi i le faaiuga o le vaiaso ua mavae.

Le afioga Afamasaga Samuelu o le sui Komesina o Leoleo.