Ua ioe nei lē sa avea ma ofisa sili lagolago o le Matagaluega o Faamasinoga sa faauluulu iai le vaega o auaunaga lautele poo le corporate service o ia lea o Sera Skelton, i le moliaga e tasi o le limatagoese a o avea ma tagata faigaluega, ma toesea ai se tupe e tusa ma le $20,000 tala.
Ua talia e le faamasinoga le talosaga a leoleo e faaui i tua ona moliaga e 81 ae ioe ai loa lē ua molia i le moliaga e tasi, ma ua faia ai le faaiuga a le faamasino le afioga Leiataualesa Darrel Clarke, e nofo taofia i le falepuipui i Tanumalala e faatali ai le aso 15 o le masina fou o Aokuso, o le a tuuina atu ai se folasaga a lana loia ma le itu a leoleo e fua iai se faasalaga faafalepuipui.
Na faaalia e le afioga i le faamasino o le mafuaaga lea ua faia ai lana faaiuga e nofo taofia Sera ona ua ioe i le moliaga ma ua mautinoa o le faasalaga o le nofosala i le to’ese poo le falepuipui.
Ua faamalieina le faamasinoga i mau na tuuina atu e le loia a leoleo e faavae ai le talosaga e toe faaui i tua moliaga e valusefulu tasi.
O lea mafuaaga o le lē lava lea o mau a leoleo e lagolago ai moliaga uma ua faaui i tua.
O tolaulauga o le moliaga e tasi a leoleo ua ioe iai lē ua molia na faailoa ai i luma o le faamasinoga o le va o le aso muamua o Ianuari o le tausaga e 2016 ma le aso 31 o Tesema o le tausaga e 2017 na faatino ai e lē sa faauluulu iai le vaega o auaunaga lautele a le matagaluega o faamasinoga ma le faafoeina o mataupu tau faamasinoga, se gaioiga solitulafono ma aafia ai se tinoitupe e luasefulu afe tala.
O le lua vaiaso ua tolopo ai le mataupu mo se faasalaga, ua tuu avanoa ai le faamasinoga i le itu a leoleo e saili poo ua toe totogi le tupe na aafia i le solitulafono.
O ia seleni na toesea, o tupe o trust funds sa totogi atu i le matagaluega o faamasinoga.
O le aso 15 o Aokuso e le gata o le a folasia ai ni tolaulauga e fua iai se faasalaga faafalepuipui, ae o le a tuu atu ai le talosaga a le loia a Sera Skelton, o le a finauina ai le tatala i tua i ni aiaiga e faatali ai le aso tonu o le a lau ai le faaiuga mo se faasalaga.
