E 28 tausaga o se alii ua ave i lalo o le vaaiga a leoleo ona o le faalavelave na tulai mai i le vaiaso talu ai na uma ai le soifua o se pasese i le uber.
Fai mai le 9News o si alii e suafa ia Ryan Grafton 30 tausaga na maliu ina ua lavea le uber na malaga ane ai i le vaveao o le Aso Lua talu ai.
O loo feta’ua’ina o se taavale na gaoia na alu i le moli mūmū ma soso’a atu ai ma le taavale uber lea i Boundary Rd i le itu i Saute Sisifo o Brisbane, maliu ai ma lē e pei ona ta’ua.
Na manunu’a ai ma le isi ana uo na o la malaga faatasi ane atoa ai ma le avetaavale o le uber.
O lē ua ave e leoleo fai mai na agai ane i le ofisa o leoleo ina ua faamatuu e leoleo le ata o le tagata o loo latou sailia i lea faalavelave.
