Ua faamaonia mai e le Sui Komesina, Susuga Papalii Monalisa Tia’i Keti le taofia ai nei e leoleo se alii 16 tausaga le matua ina ua ia faaoo manu’a tuga e faaaogā ai se agaese i se avetaavale laʻupasese i le taeao analeila.
O lea faalavelave na tupu i Tuanaʻimato ma o le alii o loo taofia nei na malaga i le taavale la’upasese sa nofo i tua o le avetaavale ma ia faaoo ai loa manu’aga i le ua o le avetaavale e faaaogā ai se agaese.
Na tu le taavale ma sulu atu loa le avetaavale i le autaaalo a le SASNOC ma o iina na maua ai loa ma lē ua taofia ina ua fai tuliga ma tamaiti taaalo.
O loo i le falemaʻi le alii avetaavale laupasese 49 tausaga mai Faleula mo togafitiga, ae ua taofia nei e leoleo le alii 16 tausaga ma o loo faia suesuega.
Ua faailoa mai e Papalii e lei faia ni moliaga o le alii 16 mai Vaitele ona o loo tālia ona mātua ma seia mae’a suesuega a leoleo i le mataupu.
Ua faailoa le faanoanoaga o le Matagaluega o leoleo ona o lenei faalavelave ua tulai mai ma aafia ai se tupulaga talavou.
Ua faailoa o lē o loo taofia e vasega 11 (Year 11) i se kolisi maualuga.
Faailoa e Papalii o le mea lea e tuualalo mai pea mo tupulaga i le matamata i ata lē talafeagai, leai se mafutaga ma mātua, leai se mafuta i le Atua.
