Ua faamaonia mai nei le pepesi ai o le faama’i o le Koviti-19 i le falema’i o Gore, ma ona o lea tulaga o lea ua faamauina ai le taofia e le auaunaga ona toe autovaa atu se ma’i, ona o manumanuga lava i le ono sasao mai i tua o le faama’i.
I faamatalaga mai le NZ Herald na faaalia ai e to’aono ma’i o loo i totonu o le falema’i ua faamaonia le aafia i le Koviti-19, na faapea ona faatino iai iloiloga ma maua ai o loo aafia, e aofia ma ni tausi soifua faamauina e to’atolu ua amata ona vaaia ai āuga o lea faama’i.
Faamauina, o lea ua taofia ai ona toe talia se ma’i e aga’i atu i le falema’i, ma taofia ai ona toe iai se tasi e asiasi atu.
Ua faatulaga ai foi ona faia puni fofoga poo masks ma le tele o vaega ina ia faaitiitia ai le pepesi o le Koviti-19.
Faamanino e le faauluuluga o le auaunaga i Gore, o le faamamafa o loo ave i le puipuia o tagata poo ma’i o loo i le falema’i i le taimi nei, faapea ona tagata galulue.
I le taimi nei e lē o iai se tasi ua ma’umau se soifua mai lea faama’i.
I faamaumauga mai le auaunaga o le soifua mālōlōina lava ia, Health New Zealand ua faamauina le oo atu i le 736 tagata ua aafia i le faama’i i totonu o le 30 aso, e aofia ai le 171 o tagata na maua mai i le vaiaso talu ai, o tagata mai itu eseese o le atunuu.
Puna o Faamatalaga: https://www.nzherald.co.nz/nz/gore-hospital-covid-19-outbreak-halts-new-patient-admissions-and-visitors/P73HAYDZONHM7FWKBONVXUE2E4/
