Ua motusia le tafe mai o tupe i tulisi mai Saina i le tuanai o malaga togipau tuusa’o e lua mai lea atunuu tele o le lalolagi, e mafua ona o aiaiga o tulafono o vaalele sivili a Samoa, e na o le lua malaga togipau e mafai ona faatino i totonu o le 28 aso.
O lona uiga o isi malaga togipau e lua o loo totoe e maua ai le fā o malaga togipau sa faatulaga, ua le mafai ona faaauau.
Ua faailoa i se pepa o faamatalaga mai le kamupani o femalagaa’iga i Hong Kong sa tapenaina ia malaga le Travel Focus, ua agai nei e tapena ni malaga tuu taimi poo scheduled flight tuusa’o mai Saina ma a mae’a lea tapenaga ma faamautu uma aiaiga e tusa o ala faaletulafono, ona faaauau lea o malaga tuusa’o mai lea atunuu i le masina o Setema o le tausaga nei.
O lona uiga o le isi lua masina o lumanai o le a faatino ai ia tapenaga a o lei oo ia Setema e toe faatino ai ia malaga tuusa’o mai Saina mo Samoa.
O le faamoemoe o ia malaga tuu taimi o le a mafai ai ona lautele avanoa o auaunaga tuma’oti e fesootai i le atina’e o tagata tafafao mai fafo i Samoa latou te maua ai faamanuiaga e ala i manaoga o tagata tulisi mai Saina o le a tafafao mai i le atunuu.
Ua momoli ai pea le faafetai a le Travel Focus i le Malo o Samoa e ala i le lagolago a le Pulega o Tagata Tafafao mai Fafo ma isi auaunaga e pei o faletalimalo a o iai i Samoa aumalaga e lua sa tafafao mai i le atunuu.
O ia foi aumalaga sa taulamua ai le Samoa Royal Tour o se pisinisi tuma’oti sa lotolotoi i le faia o tapenaga uma i le afea o Samoa e malaga togipau mai Saina.
Ua faailoa i se lipoti a le nusipepa o le Samoa Observer na taunuu le malaga lona tolu i le afiafi o le Aso Toonai na tea nei, ae leai se pasese.
Sa toe foi le vaa ma le pasese e luaselau ma ona tupu lea na taunuu mai i le malaga tuusa’o lona lua mai Saina.
