E lē o atoatoa le maua o fesootaiga televavave tau initaneti i le atunuu mo nisi o afioaga, ma ua faamaonia mai e le Pule Faatonu lea tulaga.

Ae o le mafuaaga lea o le faaulufale e nisi o tagata i lo tatou atunuu o masini satelite o le Starlink ona e lelei fesootaiga televavave e maua ai, e pei ona faagaioia e se kamupani tau fesootaiga i fafo atu o Samoa e ta’ua o le SpaceX.

O le ogatotonu o le vaiaso nei na feiloai ai tagata ua aumaia faasolitulafono i Samoa ia satelite o fesootaiga ma le Pule Faatonu e faamalamalama ai tulafono tau fesootaiga a Samoa ma aafiaga i le itu i le puipuiga ma le soifua lelei o tagata pe a lē lelei ona mataitu le faaaogāina o ia auala o fesootaiga.

Ua faailoa e le Pule Faatonu le afioga Lematua Gisa Fuatai Purcell i le mae’a o lea feiloaiga, ua iai le faaiuga a le Kapeneta e faaaogā fesootaiga satelite o le Starlink mo aoaoga ma le auaunaga a le soifua maloloina, ae e lē o faatagaina mo tagata lautele ma pisinisi. 

Ua fautuaina tagata ua aumaia masini satelite o le Starlink ina ia tuuina atu masini i le ofisa o le Pule Faatonu mo le faia iai o galuega e tusa o tulafono tau fesootaiga, ona maua ai lea o le laisene e faaaogā ai.

Peitai ua faailoa e le Pule Faatonu o loo tapena atu se talosaga a le kamupani o le SpaceX e faia iai se iloiloga pe mafai ona faatuina sona ofisa i Samoa e avea ai ma se tasi o auaunaga e maua ai fesootaiga satelite e pei ona aumaia i Samoa e nisi masini satelite a lea kamupani lea e ta’ua o le Starlink.

Le Pule Faatonu poo le Regulator, Afioga Lematua Gisa Fuatai Purcell.