Ua taofia le galuega o le faatuina o se fesootaiga tau satelite o loo faatino e se kamupani mai Hong Kong i Saina, ina ua iai ni atugaluga i le le lelei ona tapena e nisi o matagaluega a le Malo, o le aumaia o totoga mai fafo e faatino ai lea fesootaiga.
Sa fesiligia le tamaitai Palemia pe moni tala salatua o lea galuega o loo ailililo ai i totonu ni faiga e ono afaina ai le saogalemu o faamatalaga mo le puipuiga o Samoa poo le National security.
Na faaalia e le Palemia e le mafai ona faavae ni sailiiliga i ni masalosaloga peitai ua na faamaonia mai, ua taofi le galuega o le faatuina o le satelite, ae sei suesue mae’ae’a auala na faatino ai le faia o le galuega.
Sa fesiligia le Pule Faatonu le Regulator ma ia faailoa ai e le mafai ona talanoa mai i le mataupu, ona o mataupu faapea e maaleale tele ma e aafia ai le puipuiga o le atunuu.
Na faailoa mai foi e le Pule Faatonu, a oo loa ina iai se tulaga faapea o le ofisa o le Loia Sili a le Malo e tauaveina le tulaga malupuipuia o faamatalaga mai le faalauiloaina lautele.
