Ua talosaga le vaega faaupufai a le Leipa i le su’etusi sili ina ia faia se su’esu’ega i se faai’uga a le malo e aveesea lafoga poo tax mai nisi oloa tau tapaa poo HTPs i le faaperetania, ua iai ma faamatalaga e faapea o loo tau atagia mai ai ni aafiaga mai le auaunaga o loo gaosia le tapaa.
O le sooupu a le Leipa i le mataupu lea, Ayeesha Verrall ua ia talosagaina le faia vave o sea su’esu’ega i lalo o le Public Audit Act.
O le minisita lagolago o le soifua mālōlōina Casey Costello lea foi o loo minisita i le tiute na ia faa‘afa le lafoga excise tax e totogi mo nisi oloa tau tapaa, heated tobacco products i le masina o Iulai ma ua lipotia sa malilie foi iai isi sui o le Kapeneta e faataatia ese se vaegatupe e $216 miliona e kava ai le tupe sa masani ona maua mai lea auaunaga.
Fai mai lana faamatalaga i le lipoti ua mafua ona faaitiitia le lafoga ina ia unaia ai le autaumafa tapaa ia sui ane i isi ituaiga tapaa ia e ta’ua o HTPs.
O loo ta’ua o nei suiga na faatino e aunoa ma se faalauiloaga faalaua’itele na o luga o le upega tafa’ilagi a le Customs sa vaaia ai.
Manatu le Leipa o lea faai’uga ua faia e leai se faiga faavae o lagolagoina ai ae iai ona aafiaga i le soifua mālōlōina o tagata, ae lē gata i lea e foliga e na o le tasi lava le kamupani gaosi tapaa o loo penefiti mai ai.
Fai mai Costello i le RNZ e na te talia foi sea su’esu’ega auā o le a faailoa manino ai o tuua’iga o loo faia e lē sa’o.
Puna o Faamatalaga: https://www.rnz.co.nz/news/in-depth/531470/auditor-general-asked-to-investigate-costello-decision-to-slash-tax-on-heated-tobacco-products
