O le Aso Tofi o le vaiaso nei o le a su’esu’e ai e le faamasinoga faaitumalo le talosaga a le susuga Tiumalumatua Maifea Fetu, ua finau ai lana loia e faalēaogā le moliaga e tasi o le faia e lē ua molia o le solitulafono o le taufaaleaga e ala i se faasalalauga na ia faia sa faatūtū i ni sui o le vaega faaupufai o le Faatuatua i le Atua Samoa ua Tasi.
Afai ae manuia le talosaga o le muta’aga lea o le mataupu lenei, e pei ona tuua’ia ai e le ta’ita’ifono o lea pati faaupufai ma le failautusi le faia e Tiumalumatua o se faasalalauga taufaaleaga ua aafia ai o la tagata, i se faasalalauga a lē ua molia i lana tautua faasalalauga i luga o fesoota’iga faaonaponei o le api o foliga le facebook.
O loo teena e lē ua tuua’ia le moliaga a leoleo ma faatulaga ai o le Aso Faraile na te’a nei e valaau ai molimau. Peitai na auala le talosaga a Tiumalumatua ma lana loia e faalēaogā le moliaga ina ua faailoa e le loia a leoleo, e to’alua a latou molimau autū o loo malaga i fafo, o i la’ua ia o le ta’ita’ifono o le Faatuatua i le Atua Samoa ua Tasi le susuga Laauli Leuatea Polataivao Fosi Schmidt, ma le failautusi o le vaega faaupufai o le pati faaupufai le tofa Va’aaoao.
O isi foi molimau a leoleo e lei maua ni tusi valaau mo le auai i le faamasinoga. Na faaalia e le faamasino le afioga Leota Raymond Schuster, o le a tolopo le mataupu se’i iloilo muamua le talosaga o le faalēaogā o le moliaga, ma a lē manuia o le a faaauau loa ona valaau molimau a itu auai o le faamasinoga.
O lea foi ua iai se talosaga a lē ua molia ma ana loia e to’alua e fia maua se faatagana e tuua ai Samoa e lē ua molia, peitai o le a faato’ā tagofia le talosaga pe a mae’a tuuina atu se tali a leoleo pe tetee pe latou te talia lea talosaga.
