Ua faalauiloa aloa’ia ai nei le faatūina o le vaega faaupufai fou ua faaigoaina o le Samoa Ua Potopoto poo le Samoa Uniting Party, ma ua avea ai le ulua’i Palemia tamaitai o le atunuu ma ona ta’ita’i le afioga Fiame Naomi Mataafa.
O le faletalimalo o le Sheraton i Apia o le nofoaga lea na faagasolo ai le sauniga e faalauiloa ai lea vaega faaupufai o le a tauva ai le Palemia ma minisita o le kapeneta o le malo tausi e aofia ai lē sa avea ma faipule o Aleipata Itupa i Lalo na faasee tuāgalu ma le tofi minisita ona o moliaga o solitulafono tau taavale afi.
O le susuga i le faifeau Toeaina o loo tausinuu i le ekalesia EFKS i le aai o Niue i Apia, susuga Efu Efu Seumanutafa na ta’ita’i i le sauniga lotu.
Na sosoo le sauniga lotu ma le saunoaga autū a le ta’ita’i o le pati fou o le Samoa ua Potopoto le afioga Fiame Naomi Mataafa.
Le ta’ita’i o le vaega faaupufai o le Samoa Ua Potopoto, afioga Fiame Naomi Mataafa.
O loo iai le fuafuaga a le ta’ita’i ma lana vaega faaupufai o le a faalauiloa i se taimi e lē o toe mamao ona sui faatutū ma lana anavatau o le a finau ai i le faigāpalota aoao a le atunuu ia Aokuso.
