Ua faailoa le fia auai o le vaega faaupufai a le HRPP i le mataupu o loo aafia ai le Fofoga Fetalai, Papalii Li’o Taeu Masepa’u ma sui faipule e toatolu ua faamavae mai le HRPP i le tausaga ua mavae.
Na poloaia e le tamaitai faamasino o Tafaoimalo Leilani Tuala Warren le loia a le HRPP ia Fuimaono Sefo Ainuu ina ia faaulu atu sa latou talosaga aloaia i luma o le faamasinoga a o lei oo i le aso 13 o le masina lenei e toe valaau ai lea mataupu.
O loo talosaga Papalii i le faamasinoga, ina ia faamautu atu le tulaga o loo iai sui faipule e toatolu ma a latou faamavaega mai le HRPP ae fia avea ma sui faipule tutoatasi.
Ma o i latou ia e aofia ai le sui faipule o le Vaa o Fonoti ia Mau’u Siaosi Puepuemai, sui faipule o Siumu ia Tuuu Anasii Leota ma le sui faipule o Faleata Nu.4 ia Ale Vena Ale.
Na faamanino i se fonotaga ma le aufaasalalau ma tusitala mafuaaga uma na mafua ai ona faamavae i latou ia mai le HRPP lea sa tauva ai i le faigapalota o le tausaga e 2021.
I taualumaga la a le faamasinoga i le vaiaso nei na talosaga ai le tamaitai loia ia Muriel Lui e toe tolopo le mataupu ae sei faamae’a faamatalaga faatauto tusitusia a i latou ia.
Ma o le aso 13 o le masina nei o le a toe valaau ai lea mataupu i luma o le faamasinoga maualuga.
