I le faamoemoe na feiloai ai le Aoga Tulagalua a Moataa ma le Afioga i le Amepasa o le Malo a Isaraelu i Samoa nei Afioga Ran Yaakoby na tuuina ai se talosaga sa faailo e le afioga i le Sui Faipule a le Itumalo o Vaimauga 2, Lenatai Victor Faafoi Tamapua  i nisi o vaega moomia mo le aoga.

“Lau Afioga i le Amepasa, e avea ai au ma sui o le Komiti aemaise Susuga i le Pule Aoga ma faiaoga aemaise le mamalu o alo ma fanau o loo aotauina i lenei aoga e faaleoina atu ai sa matou talosaga vaivai i se fesoasoani e fausia ai se pa e sio atoa ai le aoga.

“E pei ona ta’ua e le Peresitene a le aoga nei, o le saogalemu o meatotino ma le faleaoga o se faafitauli lea o loo feagai ma le aoga i le taimi nei.

“I le taimi a o iai fanau i tuuaga o le kuata aoga, na maua ai sa iai tagata sa afea le lotoā o le aoga ma faaleaga nisi o meatotino aemaise o le toesea ai o nisi o meatotino a le aoga.”

Na toe faailoa ai e Lenatai se tasi o vaega o loo manaomia.

“Ae afai e faigata ona faatino lenei talosaga pe mafai la ona fesoasoani mai i se hall a si matou aoga e faaaogā e fai ai laugatogi ma polokalame a le fanau aemaise o fonotaga masani ma mātua.”