Ua silia i le 80 tausaga le matua o le maota tele o le aulotu EFKS i le afioaga o Laulii i le itumalo o le Vaimauga, ma ua lamatia ai le saogalemu o tagata tapuai e mafua ona ua ua lē o malosi le maota.
Ua faaalia e le taitaifono o le ekalesia le tofa Tuautu Kalepo, ua silasila nei e fausia se multipurpose hall poo se maota e mafai ona faaaoga e le aulotu, ae aoga foi mo isi fuafuaga i le atiina a’e o le ekalesia i lona tulaga lautele e mafai ona faatino ai isi sauniga e pei o faaipoipoga ma maliu.
O le finagalo o Tuautu Kalepo e le o toe taugofie galuega faapenei aemaise i lenei taimi ua felelei ane i le vateatea tau o oloa faufale ma o loo fia maua se seleni i le va o le 700 afe ma le miliona e faatino ai le galuega.
O le tatalo a le taitaifono o tamafanau, uo ma tauaiga o le afioaga i Samoa ma atunuu i fafo, mo se fesoasoani e ala i se latou leitiofoni i le Aso Toonai nei.
Ua faaalia foi e le taitaifono le tofa Tuautu Kalepo, o le masina fou agai atu i le faaiuga o lenei tausaga e tatau ona faatino ai le galuega.
