Ua valaau mai le aufaigaluega a le Newshub i le fonotaga tāua tele e faia i le taeao nei.
I se imeli na maua e le aufaigaluega i le po anapo o loo faatalosagaina ai le auai atu i le asō e faafofoga i le tala lata mai ua oo iai faaiuga a le pisinisi.
Ua sau ai i le mae’a faamaonia mai i le vaiaso ua tea o le a tapuni le Newshub i le aso 5 o Iulai ae toe faatulaga isi polokalame a le faletelevise lea o le a vāea ai le lata i le 300 tagata faigaluega.
O le fono i le asō o le a faafofoga ai foi i le faasilasilaga mai le sui Peresetene ma o ia foi o le faaulu o auaunaga a le Warner Bros Discovery, Glen Kyne.
Ae o lea ua sau ai se isi lipoti lata mai i le mae’a ai o lea fonotaga tāua na taloina a le aufaigaluega a le Newshub.
O lea ua faia se maliega a le Discovery ma le Stuff ina ia faaauau pea ona faia talafou o le 6pm i luga o le alaata a le Three pe a tapunia le auaunaga a le Newshub.
O lenei maliega e lē faapea o le a toe suia ai le fuafuaga ua faamautinoa mai a le WBD ina ia tapunia le toe faia o talafou a le Newshub, lea o le a vāea ai tagata faigaluega e latalata i le 200.
Nai lo lea, o le a tuuina atu e le WBD le faiga o talafou o le 6pm e fai e le Stuff, lea ua leva lava ona iai lana auaunaga o talafou o loo faasalalau i luga o lana upega tafailagi, ma nisi foi o nusipepa o loo tufaina atu i aso taitasi ma nusipepa faalevaiaso e aofia ai le The Waikato Times, The Press ma le The Post.
E iai nisi vaega e lē o faalauaitele maia e tusa ai o lenei maliega, e pei o le tau o le a totogia e le WBD i le Stuff mo le saunia o puletini i afiafi taitasi.
E lē o faailoa maia foi i le taimi nei poo ai o le a fofogaina le puletini i le Stuff, ae pe ono faafaigaluega foi e le Stuff nisi o tagata ia o le a vāea mai le Newshub.
O se vaega o lenei maliega, o le a umia ai e le Stuff le pule o le Newshub.co.nz
O le Aso Toonai, 6 Iulai o le a fofogaina ai le uluai puletini, i le mavae o le aso talu ona faamutaina loa faasalalauga a le Newshub.
O le a lē faaigoaina le faasalalauga fou o le Newshub.
Ta’ua e le owner ma le publisher o le Stuff, Sinead Boucher, o lenei faamoemoe o le a taulai i le saunia o ni talafou sili ona lelei mo le taimi nei ma le agai atu i le lumanai, ma o le a silasila foi i nisi auala e faaleleia atili ai talafou o le 6pm nai lo le toe faia o nisi suiga.
O nei talafou e faagasolo mo le itula atoa i aso o le vaiaso, ae ‘afa itula i faaiuga o le vaiaso.
Puna o Faamatalaga: https://www.newshub.co.nz/home/entertainment/2024/04/6pm-news-on-three-to-continue-after-newshub-closure-as-warner-bros-discovery-and-stuff-strike-deal.html?
