Na talimalo le Malo o Samoa e ala i se taumafataga afiafi sa faia i le Falemataaga o Ropati Lui Sitivinisone i Vailima i le po o le Aso Faraile ua mavae i sui o le Fono Faatonu o le Faletupe o le Lalolagi mai atunuu e 45 na asiasi mai lo tatou atunuu.
O le afioga i le Tamaitai Palemia o Samoa na saunoa i lea faamoemoe e faaalia le agaga fiafia o lo tatou malo e talimalo i lea aumalaga.
O se tulaga na saunoa Fiame o lea asiasiga ua tatala ai avanoa o faatalanoaga i luitau tāua o atunuu tau atiae.
Sa faafetaia le sao tāua o lea faletupe i le ausia ai o atinae faaauau e ala lea i le faamatuu mai o fesoasoani faaleleia o atunuu aafia i suiga ogaoga o le tau, tulaga tau faatoaga, soifua maloloina, o le atinae o fesootaiga televavae, o vaega tuma’oti, aemaise fesoasoani faamatuu mai mo sosaiete laiti e faatino ai a latou poloketi ma siitia le tomai.
Na faaalia e le tamaitai Palemia o loo taumafai lava Samoa ina ia ave pea le faatāua i ana mautauave o loo tuufaatasia ai atinae o itu e ao ona faamuamua i faatinoga o faiga faavae o le paketi mo fesoasoani lautele lea o loo faaalia ai vaega autu o luitau o aso nei, atoa ai ma le sologa lelei o le soifua manuia o le lautele aemaise i latou o aupito mafatia.
