E lei tuana’i ni masina talu ona faatūina le Matagaluega fou o taaloga ma alaga’oa mo le fiafia o tagata poo le Ministry of Sports and Recreation, ae ua tapena lea matāgaluega e talimalo i le fono faaminisita a atunuu o le Oceania o le a talanoaina ai i Samoa le tāua o le tetee atu i aafiaga o fualaau faasāina i taaloga.
E sefuluiva Minisita o taaloga o atunuu eseese o le a auai i lea fono faavaomalo o le a usuia i le faletalimalo o le Tanoa Tusitala i le Aso Lua 29 o le masina nei o Oketopa.
O lona uiga e mae’a le fono a Malo o le Taupulega i le Aso Toonai 26 o Oketopa ae o le vaiaso e sosoo ai ona tauaofia lea o le fono faaminisita i Samoa.
O le tāua o lea fonotaga ona o le a autū i le faamalosia o faiga faavae ma le galulue faatasi o atunuu e taofia le faaaogāina o fualaau faasāina i taaloga, ina ia puipuia ai le soifua mālōlōina o tagata taaalo.
O le a faasoa ai manatu o usugafono eseese i aafiaga o o latou atunuu ma o latou tagata taaalo ona o fualaau faasāina ma soalaupule faatasi ai ni auala e mafai ona siitia ai le tulaga o taaloga eseese e ausia ni tausinioga e māmā lona faatinoga e aunoa ma le faaaogā o fualaau faasāina.
O loo iai le faamoemoe e fausia ni polokalame ma ni faiga faavae e fetufaaa’i ai atunuu pe a mae’a lea faatasiga.
