O le masina fou o Novema o le a talimalo ai Samoa i le fono faaletausaga mo le polokalame o avanoa faigaluega mo tagata o atunuu o le Pasefika e faafaigaluega ai i Ausetalia ma Niu Sila poo le Pacific Labour Mobility programme.
E silia i le toaselau sui o atunuu o le Pasefika o loo avea ma sui o le polokalame lenei o le a auai, ma o se fono faaletausaga e talanoa ai aiaiga ma faiga e faatino ai le sailia o tagata faigaluega i lalo o le feagaiga tau fefaatauaiga i le va o atunuu o lenei faaitulagi ua ta’ua o le Pacer Plus.
O le tausaga mulimuli na usuia ai lenei fono o le tausaga e 2019, ae o le lua tausaga na sosoo ai 2020 i le 2021 sa faaaoga auala o fesootaiga e fono ai, ona o puipuiga o le faamai Koviti-19.
O le aso 7 o Novema e amata usuia ai lea fono i le faletalimalo o le Taumeasina Island Resort.
