O loo faagasolo i le vaiaso nei polokalame o loo faatautaia e le Toomaga mo ē Puapuagatia o talimalo ai i fanau aoga mai aoga e 14 a le Auckland Central Catholic Kahui Ako mai Niu Sila.
O lenei aumalaga o loo taitaiina lea e le Kolisi a Malisi i Aukilani o se vaega o le latou faigapaaga ma le Toomaga e pei ona fuafuaina e malaga mai ai i tausaga ua mavae ae pei ona o le pepesi ai o le Koviti-19 sa le mafai ai ona faataunuuina.
O lenei aumalaga na faafeiloai i se ‘ava o feiloaiga e alo ma fanau o loo aumau ai i le nofoaga a le Toomaga faatasi ai ma nisi o vaega o le polokalame e pei o le tapenaina o taumafa Samoa ma isi.
Na faafetaia ai e le Peresitene o le Toomaga, o Siliniu Lina Chang i latou o loo taitaiina lenei polokalame ua avea lea ma avanoa e maua ai mafutaga a fanau a le Toomaga ma fanau aoga mai Niu Sila.
O le Toomaga o se tasi lenei o faalapotopotoga o loo avea ma nofoaga e sulufai iai le toatele o fanau aemaise ai o tina ma tamaitai o loo aafia i sauaga ma o loo faatino pea ana polokalame masani i nuu ma afioaga ina ia fesoasoani i le taofia o nei faafitauli.
