O tamaitai loia ia Raewyn Laumatafiafia Imelda Madeleine Fong, Fitiilagi Ioane Faanunu faapea Minerva Antonia Peters ua Talia e le Faamasinoga Maualuga a latou tautoga e avea ai ma loia o le Faamasinoga Maualuga a Samoa i le taeao analeila.

Sa auai aiga uo ma aumeamamae faapea le afioga i le Loia Sili a le Malo o Samoa, Susuga Su’a Helene Wallwork faapea lona ofisa i le sauniga. 

Sa faia lea sauniga i luma o le Faamasino Sili o Samoa, Afioga Satiu Simativa Perese.

O le tamaita’i o Raewyn Laumatafiafia Imelda Madeleine Fong sa faauu mai ma lona faailoga o le tulafono mai le Auckland Law School, ua 21 ona tausaga ma o le a galue ai i le Ofisa o le Loia Sili a Samoa.

O Minerva Antonia Peters na faauu mai le University of Auckland ma se tulaga maualuga lona taumafai i mataupu o le tulafono (Graduate with Honors), ma o loo faigaluega foi i se ofisa loia maualuga i totonu o Niu Sila.

O Fitiilagi Ioane Faanunu na faauu mai ma lona faailoga loia (Masters of Law) mai le Iunivesite a le Vasa Pasefika i Saute (USP).

O le saunoaga a le Faamasino Sili na ia faapea ai…..”Poo le ā lava le maualuga o faailoga ua maua ae ia aua ne’i galo, ia tatou maua le loto maulalo e faafetaia ai le Atua o ia e ana le poto”.

Sa ia faafetaia le tausiga a aiga ma mātua aemaise le taimi umi sa feagai ai i latou ma su’esu’ega e lē faigofie ae mafaia mea uma i le Atua.