Na faamaonia e le loia o loo tulai mo le HRPP o Fuimaono Sefo Aiunuu i le faamasinoga maualuga, ua mae’a faaulu aloaia le talosaga a le HRPP e fia auai i le mataupu o loo aafia ai le Fofoga Fetalai, Papalii Li’o Ta’eu Masipa’u ma sui faipule e toatolu lea na faamavae mai la latou vaega faaupufai i le tausaga ua mavae.
Faailoa e Fuimaono o loo tapena foi se faamatalaga tusitusia faatauto a le HRPP e lagolago atili ai la latou talosaga ma o le a tuu atu ia vaega uma a o lei oo i le aso e toe valaau ai le mataupu.
Ae na talosagaina e le loia o loo tulai mo sui faipule e toatolu ia Muliel Lui faapea ai ma Ofisa o le Loia Sili o loo tulai mo le Fofoga Fetalai le tamaitai faamasino ia Tafaoimalo Leilani Tuala Warren ina ia tuu atu se lua vaiaso e tapena mai ai sa latou tali e tusa ai ma le talosaga a le HRPP ua tuuina atu.
O le talosaga a Papalii i le faamasinoga, ina ia faamautu atu le tulaga o loo iai sui faipule nei e toatolu ma a latou faamavaega mai le HRPP ae fia avea ma sui faipule tutoatasi.
O le aso 27 o le masina nei o le a toe valaau ai lenei mataupu.
