E silia i le 2 itula o faagasolo folasaga faaletulafono a loia a le afioga Tiumalumatua Maifea Fetu ua finauina ai le soloia o le moliaga o le faia o se faasalalauga tau faaleaga.

O lē o loo molia ma auala atu ai le talosaga o se tamalii o le atunuu e aumau ma faamautu i Sini Ausetalia ma o se tagata galue i le faia o faasalalauga i luga o upega tafailagi i le fesoota’iga o le api o foliga. O le faavae o le talosaga o loo finau ai ana loia, o le tuua’iga i le taufaaleaga o se faasalalauga na faia e lē ua molia, e le’i faatinoina i Samoa ae sa faia i Ausetalia.

Ua tuuina atu ai e ana loia vaega o le tulafono e lagolago ai lea mau, e pei o le faai’uga a le faamasinoga maualuga i ni tausaga ua mavae, na lē mafai ai ona molia se sui o le Malo o Samoa sa avea ma Amepasa o le atunuu i Uosigitone i Amerika, e mafua i ni tuua’iga i le aafia o meatotino a le Malo Samoa i se gaioiga solitulafono na ia faia.

O le mau a le itu a leoleo o loo agavaa le moliaga o lē ua molia ona su’esu’eina i le faamasinoga i Samoa ona o loo iai foi aiaiga o le tulafono e mafai ai. O le mae’a o ia folasaga faaletulafono ua faatulaga ai o le Aso Faraile o lenei vaiaso o le a aumai ai le faai’uga o le talosaga.

Afai e faamanuiaina le finauga a lē ua molia ma ana loia o le mutaaga lea o le mataupu, ae afai e lē o le tulaga lea e taunuu iai se finagalo o le faamasinoga, o le a valaau loa molimau ma su’esu’eina le moliaga.