E 63 tausaga o se matai Samoa, ua molia i le tulafono i le tele nauā o ana soligatulafono ua aafia ai nisi o tagata i totonu o Niu Sila.
O lē o loo aafia i le tulafono o le alii o Moeaia Tuai, e 19 moliaga e fesootai i sauaga matagā ua faamaonia e le faamasinoga ma le 2 moliaga fesoota’i i gaioiga o lona faia o tagata o loo i lalo o lana vaavaaiga faapei o ni tagata pologa.
O lenei i’uga na faamautūina ma faamaonia ona o tulaga mata’utia tele ma le ogaoga o gaioiga lea tagata faia faasaga i nisi tagata Samoa se toalua.
I lenei mataupu e faapea, na taofia faamalosi e Tuai tusifolau, o totogi, faasā pe tapu foi ona o i se mea i la’ua, poo le talanoa atu foi i nisi o tagata. Faamauina gaioiga tau faamata’u a Tuai na faia i nai tagata ua aafia, e ala i le toe faafo’i o i la’ua i Samoa poo le faaoolima foi pe a talanoa atu i se isi e faatatau i vaega o loo tutupu.
Ta’ua o le tasi o ē na aafia, o se alii talavou, na faamatala e oo atu lelei i le 50 i le 60 itula i le vaiaso e galue ai, mo le na o le $2-$3 i le itula; a o se tasi na iai faamoemoega e faauma lana aoga.
O le isi o se tama’ita’i talavou, na māua le aafia i sauaga matagā- poo le faiga aiga fai faamalosi (rape) ma ia faatino tulaga taufamata’u – e faapea e na te faao’o ia te ia le oti pe a ia faailoa ia tulaga.
Faamauina i ripoti mai le leitio faavaomalo, o faamaumuga o le faatautaia ai o faleoloa a le alii o Moeaia Tuai, lea māua ai le faalētonu ma le solia ai o le tulafono; e pei ona faamauina i itula faigaluega ma faasalaga.
E aofia ai foi le lata i le $78,000 o tupe maua a ē ua aafia na ave faamalosi e Tuai.
E ui na tete’e malosi lea matai i moliaga ae na mautū ma ‘au’au faatasi i latou na aofia i le faamasinoga – jury, e faamaonia moliaga a Moeaia Tuai.
O loo tālia nei le faasalaga o lea alii 63 tausaga, ma o le mea mata’utia o loo iai se faatusatusaga e faapea e tai lalata lelei lea mataupu ma se tasi o mata’upu ogaoga a se isi foi tagata Samoa na molia ma faasala i le toe’ese i le tausaga 2020.
Puna o Faamatalaga: https://www.rnz.co.nz/news/national/583757/slavemaster-moeaia-tuai-set-to-be-sentenced
