Ua teena e le faamasinoga maualuga i sana faaiuga na fofogaina i le masina na tea nei o Oketopa, le talosaga a alii ma faipule o le afioaga o Toamua, e taofi pe strike out, le talosaga a se aiga sa nofoia eleele tau Samoa o le nuu ua ave e le Malo mo le faatinoina o le atina’e tau siosiomaga o le puipuia ma faasao fanua o loo pue ai le suavai.
O le aiga sa nofoia se vaega o ia fanua o le nuu ua ave i aiaiga o le Tulafono e mafai ai ona umia e le Malo ni eleele mo ni atina’e e manuia ai tagata lautele poo le Taking of Land Act o le tausaga e 1964, sa latou taulimaina se taui e 20 afe tala ($20,000) mai alii ma faipule, i le tuutuuga o le seleni lea e tapena ese ai ma agai e faamautu i se isi nofoaga.
Peitai ua lu’i e le aiga lea tupe na tuuina atu i le latou finau e matua le talafeagai lea seleni pe a fua i le tala ese o latou fale, ma aveese uma a latou meatotino. O le teena ai e le faamasinoga o le talosaga a le nuu e taofi lea finauga i le laititi o le taui tupe e tapena ese ai, ua faatulaga ai e le faamasinoga o le a suesueina i se tulaga aoao tetele le finauga a le aiga ma iloa tonu ai le taotoga o le talosaga ma faia ai se faaiuga.
O faamaumauga a le faamasinoga o loo faailoa ai o le tausaga e 2019 na faamatuu atu ai i le afioaga le totogi mulimuli o le taui o o latou fanua ua ave e le Malo, ma o le aofaiga atoa o le taui o eleele e 2 miliona 380 afe ma le 800 tala ($2,380,800.00).
O loo totoe ai nei le aofaiga o le taui o eleele o le nuu e lei mae’a ona totogi atu iai e le Matagaluega o Puna’oa Faalenatura ma Siosiomaga e tasi le miliona 6 afe ma le 600 tala ($1,006,600.00).
Peitai o loo iai le poloaiga a le faamasinoga o loo taofia ai le totogi ia mae’a o lea taui seia vagana ua masuiga mālie le mataupu i le talosaga a le aiga sa nofoia fanua o Toamua ua ave e le Malo mo lana atina’e faasao ma puipui ai nofoaga e pu’e ai le suavai.
