Ua talia e councillors a Aukilani fuafuaga o loo sau i le paketi 10 tausaga a le pulenuu ia Wayne Brown.

E ui e lē o councillors uma na faigofie ona taliaina fuafuaga a le pulenuu, ae na malosi lava le finau a Brown ma faapea mai e lē tatau ona taofia ai le tuu pea i tua i tagata Aukilani poo fea o taoto ai o latou finagalo.

O le talia ai e councillors o le paketi e lei pasia o lona uiga o lea o le a avanoa mai ai mo tagata Aukilani e faaali finagalo ai, ma o loo sau ai le ono sii i luga i le 7.5% o rates i le tausaga muamua, 3.5% e sii ai i le tausaga lona lua, 8% e sii ai i le tausaga lona tolu ina ia faafetaia’i ai poloketi o le City Rail Link, ma uma lea ona faaauau sii ai pea lea i tausaga mulimuli mai fua i le maualuga o le inflation.

A faaliliu tupe le 7.5% rates o lona uiga o le a $3,827 e totogi i rates suia mai ai mai le $3,560 o loo iai nei.

E ese mai i rates o lea foi ua faaataata mai e le pulega o le suavai a le Watercare le sii mai le $1,340 o loo iai i le tusa ma le $1,742, ma o lona uiga e uma ane e tusa ma le $5,569 mo le vai faapea rates e totogi e le aiga, tusa lea ma le $107 i le vaiaso.

O Fepuari agai ia Mati o le tausaga fou o loo fuafua ai faatalanoaga faia faalauaitele e faaali finagalo ai tagata Aukilani ae e lei faamautuina ma aloaia nei fuafuaga mai ia Iuni o le tausaga fou.