O le taeao nei ua nao le loimata maligi na faaalia e le Matagaluega o Tupe ina ua faailoa e le Ofisa Sili o lea Matagaluega afioga Leasiosiofaasisina Oscar Malielegaoi lona taliaina ai o se tusi mai le Minisita o Tupe ina ia faamavae ma lona tofi (asked to resign).

I ripoti a ofisa faasalalau i Samoa e ala i lomiga ma Leitio na taua ai le maligi o loimata o le afioga ia Leasiosio ina ua fai lana lauga faamavae i lana Matagaluega na tautua ai talu mai le tausaga e 2003 ma filifilia e avea ma Ofisa Sili i le tausaga e 2019.

Taua e ripoti o le Aso 26 o Aukuso na tuu atu ai se tusi ia Leasiosio ina ia oo atu i le Aso Faraile 27 o Aukuso ua tuu atu lana tusi faamavae.

“O le aso ananafi na o’u mauaina ai se tusi mai le susuga le Minisita o nei lo’u aso mulimuli i le matagaluega, poo le tusi e ‘asked to resign’ effective today. Ia ua o’u talia e ui i le faigata ona o le agaga o le fia tautua pea mo le malo”.

Taua foi e Leasiosio i lana lauga faamavae “Ia manatua o le tatou galuega e tautua le malo i aso uma poo ai lava e tulai mai, afai na tuu atu lau 100% i le aso ananafi ia tuu atu le 201% pea ou aluese”.

O Leasiosio o se alo e faasino ia Tuilaepa Lupesoliai Sailele Malielegaoi ma le faletua ia Gillian Malielegaoi.

O se tamaalii ua silia ma le 18 tausaga talu ona tautua i le Matagaluega o Tupe aofia ai ma tausaga na avea ai ma Ofisa Sili. O le tausaga e 2008 – 2010 na avea ma Ofisa Lagolago Public Trustee a le Public Trust Office.

Sa avea ma Sui Ofisa Sili o le vaega o Tupe (Budget Division) a le Matagaluega o Tupe mai le tausaga e 2010 – 2014. I lea lava tausaga (2014) na avea ai  ma Faatonu faufautua a le Asian Development Bank.

Peita’i lea ua faamavae mai i lona tofi Ofisa Sili a le Matagaluega o Tupe i le asō, ona o se manaoga a le Minisita aua e feteena’i lona sootaga faaleaiga ma le malo fou (conflict of interest).