Samoa police

Talia e le faamasinoga le faia o tusi saisai e avatu faamalosi ai molimau

A’o faagasolo ai pea suesuega o faamasinoga o palota i tagi o tuuaiga o faatosina solitulafono mai le itumalo o Anoamaa No. 2 e toalima molimau e lagolagoina tuuaiga a le afioga ia Toomata Norah Leota faasaga i le afioga ia Lauofo Fonotoe Pierre Lauofo Meredith, na fiu leoleo e valaau suafa mo le o’o atu e faia a latou mau tuu fofoga ae le’i oo atu. Ua talia ai e le faamasinoga le talosaga a loia  mo Toomata Norah ina ia tuu atu ni tusi saisai e avatu faamalosi ai nei molimau e tulai i le faamasinoga e fai a latou mau.

O le aso muamua o suesuega o lenei mataupu  na tulai mai ai se gaioiga na toe aveesea faamalosi mai ai se tasi o molimau a le itu tagi ma e oo ina toe faaauau suesuega i le aso ananafi e le’i oo atu lava lea molimau.

Na faaalia e se tina o se tasi o molimau a le itu tagi i luma o le faamasinoga o lona toalua lea na toe aveesea e se tasi o lona aiga ma laua te le’i toe feiloai i le Aso Lulu atoa e oo mai i le Aso Tofi na tulai mo lana molimau tuu fofoga. 

O se mataupu muamua lea o tagi tau palota ua tūtū ‘aai ai nei leoleo i le vaaiga o molimau, i le avatu ua faanonofo lelei i se potu e faatali ai le taimi e valaau ai le tagata mo lana molimau. O le au tapua’i uma a itu auai o lenei faamasinoga e le maua ni nofoa i totonu o le potu faamasino ua ave uma i le isi vaega o le maota faamasino e tapuai mai ai ae ua le’o toe faatagaina se tasi i fafo mai o potu faamasino.

Ua faia lea gaioiga a leoleo ina ia le toe aliali mai tulaga na vaaia i le aso muamua i le aveesea faamalosi mai o molimau o se faiga ua faamatalaina e le tulafono, o se gaioiga ua taumafai e taofi le sailia o le amiotonu poo le obstruction of justice.

O tu’uaiga ua maea ona suesue o le tuuina atu lea o tupe e nisi o sui lagolago a Lauofo Fonotoe i ni tagata palota faapea tuuaiga o tupe na tuuina atu i le taimi  o le faalauiloa a le FAST (Roadhsow) i nuu o le itumalo o Anoamaa No.2 i le masina o Mati a’o lumanai le palota ia Aperila. O ia seleni o teutusi ta’i $1,000 tala o fa’aaloaloga a le patī faaupufai e tali atu ai i le ‘ava faatali ma fa’aaloaloga masani faaleaganuu.

O loo tuuaia ia faaaloaloga o se faatosina mo Toomata Norah ae o loo teena e molimau o le itu tagi sa auai i le faalauiloa na faia i le afioaga o Solosolo.

O le vaiaso fou i le Aso Gafua o le a amata ai faamasinoga o palota mai le itumalo Aana Alofi No.2 i le tagi o le sui tauva tamaitai a le FAST le afioga ia Lolomatauama Eseta Fa’alata Mataituli faasaga i le sui na manumalo o le vaega o le HRPP le susuga ia Aiono Afaese Toleafoa. 

O le amataga lava o le vaiaso fou e suesue ai foi le tagi mai le itumalo a Sagaga No.1 i moliaga na faaulu e le sui tauva o le FAST Papalii Tavita Moala faasaga i le sui manumalo a le HRPP le afioga ia Loau Solamalemalo Keneti Sio.  O le a valaau ai foi mo suesuega le tagi na faaulu e le isi sui tauva o le FAST le afioga Afemata Palusalue Faapo mai le itumalo a Safata No.1  faasaga i le sui manumalo a le HRPP le afioga Le’aana Ronnie Posini.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required